ورق الشجر مايل علي الجانبين
بعشق واحب الرسم و التلوين
من يوم ماصوتي فجأة صار مكتوم
ما لقتش أجمل من كلام العين
و أكتب بدمع القلب القلب ع الخدين
...
صابرة و صبري لسه ما نفدشي
وبكيت كتير بس البُكي ما فدشي
قلبي بينبض لسه فيه الروح
و هيجي يوم يسكت ما ينبضشي
قلبي مُتيم في هوي الأشعار
ميقولش آي لو ينكوي بالنار
محتارة بين قلبي وبين عقلي
و القلب دايماً يقبل الأعذار
محتارة والقلب معايا أحتار
خايفة يغير ويقلد الثوار
بينوا وبين الروح في عشرة و ود
بينوا وبين العقل دايماً تار
الليل يغيب و بيجي بعده نهار
أهمس لروحي و اردد الأذكار
بطلة في فيلم السهرة أعيش دورها
وكل يوم تتبدل الأدوار
برسم حكاية عشان أعيش فيها
وساعات أصدق لما بحكيها
و خيالي دايماً طيف محاصرني
أسواره عالية ونفسي أعديها
خيال و أقضي الليلة بتخيل
و اسرح في ليلي و هوبيليل
و أسمع أدان الفجر والتاسبيح
رقصة نهاري وهو بيميل
حاضنة خيالي وهو حاضني
بطل المُسلسل طيفه حاصرني
بسرح كتير والعمر بيعدي
وحاجات جميلة بتتسرق مني
بهرب من الواقع ومضطرة
أني أعيش حُرة ومش حُرة
و أشوف حياتي بتتسحب مني
وأسكت و ما أتكلمش بالمرة
عايشة أميرة جوه أحلامي
نفذت فيها حُكم إعدامي
لو كنتي ناوية تخافي م الأحلام
خلاص يا عيني بطلي تنامي
كارهة الحقيقة وهيه كارهاني
بزرعها وردة ف وسط بستاني
دبلانة مهما أختلفت الألوان
هيه اللي جانية و لا انا الجاني
تايهة الحقيقة بكل ألوانها
حابسة ف قلبي وهوا سجانها
وساعات بشوفها بس ما عرفهاش
و أمسك بإيدي الفرشة وارسمها
قطرالندي يشبه دموع العين
نجمة بتحرس زهرة الياسمين
ترسمني شمعة ف جو رومانسي
ترسمني سهم وحاضن القلبين
بعشق و احب الرسم والتلوين
ورق الشجر مايل علي الجانبين
ورق الشجر مايل علي الجانبين
0 التعليقات:
إرسال تعليق